سه‌رۆكى هه‌رێمى كوردستان پێشوازى له‌ هارى ڤان بۆمل ئه‌ندامى په‌رله‌مانى هۆڵه‌ندا ده‌كات

13:15:35, 17-01-2012

ئه‌مرۆ سێشه‌ممه‌ 17/1/2012 به‌رێز مسعود بارزانى سه‌رۆكى هه‌رێمى كوردستان له‌ سه‌ڵاحه‌دین پێشوازیكرد له‌ به‌رێز هارى ڤان بۆمل ئه‌ندامى په‌رله‌مانى هۆڵه‌ندا و به‌رپرسى لێژنه‌ى كاروبارى ده‌ره‌وه‌ى په‌رله‌مان و به‌رپرسى په‌یوه‌ندییه‌كانى ده‌ره‌وه‌ى پارتى سۆسیالیستى هۆڵه‌ندى.

له‌ دیدارێكدا ، به‌رێز هارى ڤان بۆمل له‌ ئامانجى سه‌ردانه‌كه‌ى بۆ هه‌رێمى كوردستان دواو كه‌ كاركردنى زیاتره‌ بۆ ئه‌وه‌ى وڵاتانى جیهان دان به‌ كۆمه‌ڵكوژى ئه‌نفال و كیمیابارانى هه‌ڵه‌بجه‌ وه‌ك تاوانى دژ به‌ مرۆڤایه‌تى و جینۆساید دابنێن و كار بۆ به‌رزكردنه‌وه‌ى ئاستى نوێنه‌رایه‌تى هۆڵه‌ندا له‌ هه‌رێمى كوردستان بۆ كونسوڵگه‌ریى هه‌میشه‌یى و هاندانى كۆمپانیاكانى هۆڵه‌ندا بۆ ئه‌وه‌ى كارى وه‌به‌رهێنانى له‌ هه‌رێمدا بكه‌ن.

سه‌رۆك بارزانى سوپاسى به‌رێز هارى ڤان بۆملى كرد بۆ ئه‌و هه‌وڵانه‌ى كه‌ ده‌یدات له‌ پێناو ئه‌و ئامانجانه‌دا و پشتگیری خۆیشى بۆ دووپاتكرده‌وه‌ له‌ سه‌رخستنى كار و چالاكیه‌كانى.

هه‌ر له‌ دیداره‌كه‌دا ، دوا په‌ره‌سه‌ندنه‌كانى سه‌ر گۆڕه‌پانى سیاسى عیراق و ته‌نگژه‌ى ئه‌م دواییه‌ى كه‌ دووچارى بۆته‌وه‌ بیرو بۆچوون ئاڵوگۆڕكران و سه‌رۆك بارزانى _ش دووپاتیكرده‌وه‌ كه‌ چاره‌سه‌رى ئه‌م ته‌نگژه‌یه‌ به‌ پابه‌ند بوون به‌ ده‌ستوورى هه‌میشه‌یى و شه‌راكه‌تى راسته‌قینه‌ ده‌بێت .

92 جار خوێندراوه‌ته‌وه‌